Tuesday, August 29, 2006

機場跑道 ...

你知唔知道 ... 香港國際機場有南、北兩條跑道 , 各長 3,800 米 , 闊 60 米 ... 至於 Instrument Landing System ( ILS ) 進場既類別 , 南跑道 ( 07R/25L ) 係 CAT II , 北跑道 ( 07L/25R ) 係 CAT III A , 可以俾飛機在能見度只有 200 米既情況下著陸 ( 當然架飛機都要有相關既裝置啦 ~ )

大部份既時候 , 北跑道 ( 07L/25R ) 係俾客機降落 , 而南跑道 ( 07R/25L ) 就俾客機起飛同貨機起降 ... 至於幾時用 07R , 幾時用 25L 來起飛 , 咁就要睇下果時吹緊咩風啦 ... 飛機起飛一定要有 head wind , 唔可以有 tail wind ... ( 所以祝人地「一路順風」呢句話唔係完全正確架 ! ) 當然仲要睇埋有無 cross wind 啦 ~~~

Saturday, August 26, 2006

南京、無錫、蘇州、烏鎮、杭州、上海 6 天遊 ...

之前話過 post 返前排去旅行 d 野出來 ! So here we go , but pls note that ... 成個行程可能仲有其他地方去 , 不過如果無咩特別既話 , 我輕輕帶過就算或者索性唔提 ~~~

因為時間既關係 , 來唔切收集資料玩自遊行 ... 況且都係去中國咁近 , 費事煩 , 所以決定跟團去 ! 後尾揀左關鍵 , 最抵死係無耐有人 foward 左以下呢個 mail 俾我 :
----------------------------------------------------------------------------------------------------------------
關鍵旅行社口號
"正常版"
食得招積,住得舒適,遊得出色,旅遊超值,旅行搵關鍵,招積出色舒適超級超值 ...
旅行搵關鍵,關鍵全實現~

"刻苦版"
食得的色,住得偏僻,遊得急迫,旅遊乞食,旅行梗慳儉,的色偏僻急迫超級丐食 ...
旅行搵關鍵,自己攞來賤!
----------------------------------------------------------------------------------------------------------------
經過我親身體驗過之後 , 發現 "刻苦版" 講既野係無錯既 , 咁究竟我係咪自己攞來賤呢 ?
哈哈 ... anywayz 廢話少講 , let's go !!!

8 月 7 日 星期一 天晴 第一日 - 上海

朝早 07:30 起身 , 因為 08:30 要嚮機場集合 ( 佢話 ... ) , 但係班機 11:00 先起飛喎 !? 駛唔駛咁早先 ? 我都 9 點有多先到 , 算係咁啦 ! =P 講返呢 , 其實本來個行程應該係由南京開始玩落上海 , 不過宜家掉返轉 , 由上海玩返上去南京 !


上海磁浮列車

去到上海都差唔多 14:00 , 一落機第一個節目就係坐上海磁浮列車 ( 英文叫 Shanghai Maglev Train 喎 ! ) 我都係第一次坐 , 一眼望落去架車好普通咋喎 !? 點知一開車 ... holy , 極速 430km/h , 拿 ... 有相為証架 ! 真係話咁快就到 !!!
.
.
老城隍廟

唔 ... 無咩特別 ? 我諗本來應該幾靚既 , 不過宜家純粹係一個旅遊商業區 ... 仲話咩咩「到上海不去城隍廟 , 等於沒到過大上海」By the way , 呢位係導遊 Mandy , 都算幾靚女 =)

.
.
夜遊黃埔江

維港夜景係香港人既驕傲 ! 黃埔江夜景都可以話係上海人既驕傲 ! 其實計我話上海夜景仲巴閉 , 因為就算俾你去到 , 都未必有得你睇 ... 原因係上海市政府規定為左節省用電 , 凡當日天氣溫度高於 36 度 ( 有人話 40 度 !? ) 黃埔江兩邊就唔會亮燈 , 咁就可以俾人民有足夠電力喎 !

好彩我去果晚有亮燈 , 真係幾靚架 ! 唔 ... 同香港既夜景有 d 唔同囉 ~ 因為浦東果邊係高樓大廈 , 好摩登 ... 浦西果邊係好有特色既建築物 ( 有成一百年歷史架啦 ! ) , 咁兩邊加埋會有一個好強烈既對比 !

.

8 月 8 日 星期二 天晴 第二日 - 上海

黃埔江外灘

第二日一早又去過外灘 , 其實尋晚咪來過囉 !? 導遊姐姐話帶我地睇下黃埔江日頭既景色 ... 都唔錯既 ,不過我就覺得好似都係夜晚來有 feel d 喎 !?
.
.
上海長風海洋世界

呢個都係我期待既節目之一 , 幅圖果條魚叫海象魚 ... ( 唔係果兩條鯊魚呀 ! ) 生活左一億幾年 ... 就咁睇幅圖察覺唔到啦 , 但係佢有差唔多兩米長 , 成百斤重 ! 除左呢個仲有好多其他海洋生物既 : 大海龜 , 無數鯊魚 , 魔鬼魚等等啦 ...

.

8 月 9 日 星期三 天晴 第三日 - 杭州 ~ 烏鎮

杭州西湖

到杭州點會唔去西湖 ? 朝早食完早餐 , 我地就坐船出去遊一遊西湖啦 ! 中國十大奇景 , 第一係萬里長城 , 第二係桂林山水 , 第三 ? 咪就係杭州西湖囉 ! 不過記住係杭州西湖 , 咪去錯 ! 中國大陸咁大 , 西湖都好似有三十幾個 , 個湖嚮西邊就叫西湖架啦 ~
.
.
我認為如果未去過西湖 , 有機會一定要去 !!! 就算去過都可以再去 , 試下唔同既季節去 , 感覺應該大有不同 ! 況且西湖有十景最為著名 : 蘇堤春曉、柳浪聞鶯、花港觀魚、曲院風荷、平湖秋月、斷橋殘雪、南屏晚鐘、雙峰插雲、雷峰夕照、三潭印月 , 我只係去左頭三個咋 !
.
.
.
水鄉烏鎮

江南水鄉有六個 , 分別係周莊、甪直、同裏、南潯、烏鎮同西塘 , 導遊姐姐話佢去過咁多個 , 最靚係烏鎮 ( 唔知佢有無講大話啦 ... ) 其他五個我未去過所以我唔知 , 但烏鎮又真係幾靚既 , 話晒都被稱為 " 中國最後的枕水人家 " 值得一去 ... 值得一去 ...

.

8 月 10 日 星期四 天晴 / 有雨 第四日 - 蘇州 ~ 無錫

金雞湖 / 平門三景

人地成日話 : 「上有天堂 下有蘇杭」杭州去完啦 , 跟住就去蘇州啦 ! 蘇州有個金雞湖同埋平門三景 , 都無咩特別呀 !? 唯一一樣野就係蘇州市內好整齊 , 街道依河而建 , 臨水而造 , 前巷後河 , 人地成日講既「小橋、流水、人家」, 我諗就係呢 d 呱 !?
.
.
三國城

一話無錫 , d 人就即刻諗起無錫排骨 , 哈哈 ~~~ 無錫其實有個太湖風景區 , 又話咩山外有山,湖中有湖 ... 我就真係睇唔到啦 , 鬼咩 ~ 個湖咁大 , 湖邊望過去好似個海咁 , 有咩好睇 ? 除左排骨 , 無錫仲有一樣野出名架 ... 就係紫砂茶壺囉 ! 今次去無錫就去左個叫三國城既地方 , 好多時用來拍戲 ... 入面都幾多野睇架 ! Oh ~ 呢個就係領隊 Tony 哥哥 !

.

8 月 11 日 星期五 天晴 第五日 - 南京

夫子廟

南京為中國四大古都之一 ( 仲有西安、洛陽同北京 ) , 本應有好多好多歷史遺跡 ... 不過好可惜 , 宜家大部份呢 d 歷史既見證已經唔存在 , 就算俾你見到果 d 都大有可能係仿照返以前既古蹟再重新做過 ... 因為都俾日本人一把火燒晒啦 , 所以南京我真係覺得無咩好睇 ...
.
連個夫子廟都要俾錢入去既 , 入去睇下壁畫 !? 我梗係無入啦 ... 靜係嚮出面四周圍行下咋 !

8 月 12 日 星期六 天晴 第六日 - 南京 ~ 香港

長江大橋

長江上第一座由我地中國人自行設計建造既雙層式鐵路同公路兩用橋 ... 「噢 ~ 多麼的雄偉壯觀啊 !」認真咁講 , 呢條係中國人既所謂爭氣橋 , 因為當時全世界無一個國家認為嚮長江上面係可以起條橋既 ! 南京長江大橋既建成 , 可以話係世界橋樑史上既一個偉大奇跡 !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講返啦 , 今次去覺得印像最深刻既地方係杭州同烏鎮 , 因為真係好靚 @v@ 而上海係個大城市 , 如果要睇大城市 , 我駛鬼去咩 , 留嚮香港咪有得睇囉 ! 或者去之前 expectation 太高 , 去完上海之後既感覺係 " 都係咁 ... 無咩咁巴閉 " ! 至於蘇州、無錫就普普通通啦 ~~~ 南京就覺得直情無野睇添 !

仲有一樣野要提一提 , 其實個領隊都講得無錯既 , 佢話去邊度玩就間間旅行社都係咁上下架啦 ! 團費平定貴都係睇下食得好唔好 , 住得舒唔舒服 ... 所以總括來講 , 都唔算係 " 自己攞來賤 " 既 ! 睇下你自己點衡量啦 ~ ^___^

Friday, August 25, 2006

又一個禮拜 ...

咁又一個禮拜 ! 話晒都係剛開始 ... 唔駛返 shift 住 , 暫時都仲係 9am - 6pm ...

話就話日日準時返工放工 , 但係每日返到屋企 , 食完飯就即刻攤晒 d notes 出來 , 又要 review 又要執過晒 , 有 d 仲要寫過 ... 無辦法 , 實在太多新野學 , 唔睇多次真係唔記得 ... 其實大老闆每日都唔係教我好多野 , 佢又有野做 , 係久唔久坐落來講兩三個字 ... 行過就問下我有無問題 , 之後 i'm on my own again ! 總之一句講晒 : 完全係返學 feel , 一 d 都唔似返工囉 !

唉 ~ 希望宜家辛苦 d , 遲 d 真係落手落腳做既時候會舒服 d 啦 =)

Friday, August 18, 2006

第一日返工 ...

第一日返工 , 無咩特別 ... 都唔駛做野 , 成日就係見到 d 機師行出行入囉 ~~~

上司俾左本書我睇 - Flight Operations Management Level 1 , 睇左成日 @.@ 其實睇就好快 , 不過要一邊睇一邊 take notes ... 包括 Aviation Law 同一大堆天氣既知識 , 好似上緊 Geography 咁 ! 仲有好多野要背 , 例如 Airline Code , City Code 同 Airport Code ... 我諗呢個咁樣既返工模式都要維持一段時間 ...

Thursday, August 17, 2006

Foundation Training Course ...

今日係 training 既第三日 , 亦都係最後一日 ... 不過上堂只係上半晝 , 下晝係 Airport Fam., 由 Departure Hall (Non Restricted Area) 到 Restricted Area ( 第一次用 AA 張 permit 入機場禁區 ) 再去 Arrival Hall ... 足足行行企企左 3 個鐘 , 腳都軟 ~____~

聽日正式開工 ! 今晚早 d 訓 !!!

Tuesday, August 15, 2006

暑假結束 ...

放左個半月假 , 終於要結束我既暑假啦 ! >____<

上個禮拜去左旅行 , 返來香港休息左兩日 , 今日係第一日返工 ... 其實頭三日都係 training , 我唔係 CSO 所以 training 就係得三日咁多 ( 佢地 CSO 要 train 成個月 ... ) , 講果 d 都係基本野啦 ! 之後我就要返自己工作崗位做 on job training ... 唔 ~~~ 成班廿幾人 , 包括我在內得 3 個男仔 ... Flight Ops 既就得我一個 !

剛剛開始新工作既關係 , 遲少少先再寫返旅行 d 野同埋 upload 返 d 相上來 , 請拭目而待 ! 哈哈 :D

Monday, August 14, 2006

給自己的禮物 ...

今日送左份小小既禮物俾自己 , 哈哈 ... 其實都唔小 , 不過算啦 ~
不斷咁同自己講 " 好好俾心機做野啦 !!! " " 哦 ... 係 !!! "

Friday, August 04, 2006

度身做制服 ...

因為下個禮拜去旅行 , 而叫我地去度身做制服果封信又寫明要 8 月 4 日至 8 月 12 日去 ( 我 8 月 12 日先返香港 ) , 所以今日下晝就過左觀塘搞埋佢 , 廢事煩 !

不過去到竟然撞到尋日做 body check 時見到既兩個女仔 , 佢地都認得我 ! 後尾我度完走先 , 8 月 15 見 ~~~ =)

Thursday, August 03, 2006

Body Check ...

今日打 3 號風球啊 !!! Anywayz , 今日要上 HIAS 搞 d 文件上既野 , 順便去做 body check ...

11:00 準時到達 , 入到 conference room 見到大部份都係女仔 , 有幾個都幾靚女架 ! 哈哈 ~~ :D 心諗 : 佢地唔似做 Flight Op. 喎 ? 後尾聽聽下 ... 原來佢地好似全部都係 CSO ( Customer Services Officer ) , 有 d 係 airside , 有 d 係 landside 既 !

HR 果位小姐跟住派左好多張 form 俾我地 ... 仲有隻 training 既 CD , 要返工前做 at least 3 個 chapters ( 總共有 9 個 -____- ) 一路派一路 brief 我地 ... 仲有一封信係俾我地拎去度身做制服架呢 !

講左大概 1 個鐘 , 跟住佢就叫我地去 Permit Office 度影相做埋機場禁區個 permit , 之後去做身體檢查 ... 等左超耐 , 越等就越肚餓 ... 後尾由 13:00 搞到 15:00 ... 唉 ~~~

下次再返去係 8 月 15 日 , 第 1 日係 training 09:00 - 17:30 ... 好 ~ 咁襯呢段時間緊係要繼續玩啦 ! 下個星期一我去華東一個禮拜啊 !!! 嘩哈哈 ~~~